Monday, November 2, 2020

73. සමගි බලේ



උදේ පාන්දර ඇහෙනවා අහසෙන් ලොකු සද්දයක් 
ඉර මාමයි වළාකුලයි අහසේ ලොකු රණ්ඩුවක්

හදලා මම ලොකු වැස්සක් අද පොළොවට වස්සනවා
පුංචි අයට ඔරු යවන්න මිදුලෙ වතුර පුරවනවා

ඒවා කොහෙද මාත් එක්ක අව්ව ගොඩක් මම දෙනවා
එළියේ සෙල්ලමට ළමයි එතකොට සතුටින් එනවා

බෑ බෑ අද මගේ දවස ගිය සතියෙත් හිටියෙ ඔයා
අද වැස්සොත් හොඳයි කියා ගොවි මාමත් කියල ගියා

ඔයාගෙ ඔය වැස්සෙ තෙමිල ලෙඩ වුනොතින් පවුනෙ ළමයි
ඒ වගේද මගේ අව්ව විටමින් ඩී ඇඟට ගුණයි

වැස්ස හින්ද තමයි ලෝකෙ සැම ජීවත් වෙලා ඉන්නෙ
පැල හැදිලා මල් පිපිලා එළවලු පලතුරු හැදෙන්නෙ

ඒ දේවල් වෙන්නෙ ඉතින් මගෙත් උදව් ඇතුව නේද
වැස්ස වැහල විතරක් මදි අව්වත් ඔක්කොටොම ඕන

හා හා දැන් හොඳටම ඇති  නවත්වන්න ඔය රණ්ඩුව
අහස ඇවිත් මැදට පැනල නවත්ත ගත්තා දෙන්නව

රණ්ඩු කරන්නට ගියොතින් ලැබෙන දේත් නැති වෙනවා
මිතුරු වුනොත් සමගි බලේ අපිට හොඳම දේ දෙනවා

ඔයා වහිනකොට එහෙනම්  මම එන්නම් අව්ව අරන්
යාලු වුනා ආයෙ දෙන්නා  ඒ ඔවදන හිතට අරන්

අව්වයි වැස්සයි ඇති විට අහස පුරා පාට හතයි
දේදුන්නක් හිනා වෙවී  සමගි බලේ ලොවට කියයි!

© සිත්තර පැංචි 

No comments:

Post a Comment

අලුත් සිතුවම්

136. සූකිරි දත්