Friday, May 17, 2019

56. වෙසක් කූඩු


පාට පාට කොළ කපලා කතුරෙන් පරිස්සමින් අලවා
වෙසක් කූඩු මේ තුනක්ම අම්මත් එක්කල මං හැදුවා
බල්බ් දමාලා තාත්තත් එක්කල තව ලස්සන කරවා
පත්තු කරන්නට පෝයදාට මට ආසාවේ බැරුවා

පිපිච්ච වතුසුදු  කඩලා මගෙ පොඩි වට්ටිය පුරවන්නම්
ඒ මල් අරගෙන වෙසක් පොහෝ දින පන්සල වෙත යන්නම්
ගාථ කියා බුදු සාදුට වැඳලා සිත තුටු කර ගන්නම්
හොඳ ළමයෙක් වෙන්නට බුදු සාදුට පොරොන්දුවක් දෙන්නම්.

55. ඕලු පිපීලා


ඕලු පිපීලා විල ලෙලදෙනවා - රතට රතේ නංගෝ
ඕලු නෙළාලා මාලා ගොතාලා - ගනිමුද අපි නංගෝ
ඔන්න වැස්සකුත් එනවා
ගමු ගමු කුඩයක් හා හා
 ඕලු නෙළාලා මාල ගොතාලා
පළඳිමු අපි මාලා


54.මුහුදු වෙරළ


මුහුද බලන්නට බබෙකුට ලොකුවට ආසාවක් ආවයි.
ලස්සන ඇඳුමක් ඇඳලා හනිකට ඇය වෙරළට ආවයි
සුළඟට හසුවී ඇගෙ දිග කොන්ඩේ එහෙ මෙහෙ පා වූවයි
දේදුණු බබෙකුත් මේ මහ කලබල බලන්න දිව ආවයි

වෙරළේ නටලා වැලි ගාගන්නට අනෙ මට නම් බැරියෝ
මාව ගලවලා තියලා යනවද මගෙ සුදු කිරි පැටියෝ
බයෙන් හරිම එක සපත්තුවක් හයියෙන් බෙරිහන් දෙනවෝ
අනිත් සපත්තුව ආසයි වතුරට එනිසා හිනැහෙනාවෝ

මොකක්ද දැන් මං කරන්නෙ කියලා බබා ටිකක් සිතනා
ටිකිරි මොළෙන් මෙහි වාසි අවාසිය හිමිහිට මැන බලනා
මුහුද සිනාසී හරි ලොකු රැල්ලක් වෙරල වෙතට එවනා
ඔක්කොම ඉවරයි, පුළුවන් හය්යෙන් බබා උඩට පනිනා

Monday, May 13, 2019

53. හොඳම අම්මා




ඩේ කෙයා ඉඳන් දවසෙම - අම්මා ගැන මතක් කරන්
කාඩ් එකක් හදනෙමි ලොව - හොඳම අම්මට

රස්සාවට ගියේ නැතොත් - අපිට සල්ලි නැති වෙනවා
මාව ඩේ කෙයා තියන්නෙ - බැරිම හින්දම

ආස නැතත් ආසා වගෙ - පෙන්නාගෙන මං ඉන්නව
කරදරයක් නොවෙන්න තව - මගේ අම්මට

වෙලාව ඉක්මනට ගිහින් - ඔරලෝසුවේ පහ වදින්න
අම්මා ඒවි වැඩ ඇරිලා - මං බලන්නට

පහේ ඉඳන් මං අම්මට - අම්ම මටම අයිති වෙනව
කාටවත්ම බෑ දෙන්නව - වෙන් කරන්නට.



Wednesday, May 8, 2019

52. දේදුනු


වැස්ස පොඩ්ඩයි අව්ව පොඩ්ඩයි එකට අහසට පැමිණුනා
වළාකුල් දෙක අතර දේදුනු බබෙක් එවිටම ඉපදුණා
සිනාසී පෙති විදා හනිකට පේළියක් මල් සුපිපුනා
බලා ඉඳ ඒ දෙසම පොකුණේ පිරුණු නිල් දිය හිනැහුනා

උදේ එනවිට සෑමදාමත් අහස විනිවිද බලනවා
අදත් දේදුනු ඇවිත් නෑ නේ කියා මැසිවිලි නගනවා
දහස් ගානක් පාට දේදුනු රෑට හීනෙන් පෙනෙනවා
මතක හිත තුල තියන් තිස්සෙම බබා දේදුණු අඳිනවා


අලුත් සිතුවම්

85. බකමූණු නින්ද